I dexe valoî da çiviltæ lìgure

(Verscion zeneize de Lusciandro Guason)

1. Çentralitæ e importansa do travaggio (o "dâse da fâ" lìgure) inte 'n mondo donde l'ëa ciù fòrte o costumme féudale di scignoöti (re, imperoei, féudatäi, etc...) che viveivan de sfrutâ o lòu di ätri, con de vëe e pròpie réndie parascitäie in sciâ tæra;
2. Vertadëa solidaietæ e proteçion de personn-e ciù scernïe, che allantöa a l'aiva o nomme de beneficensa, e a l'à visto nasce inta Repùbbrica de Zena l'Abergo di Pövei, l'Uspiâ de Pammaton e un vëo e pròpio insemme de leze soçiale pe protezze da-i patroin quelli che travaggia, pe mezo de 'nna Magistratùa ascì, e à sta mainëa chì l'é stæto antiçipòu de sécoli e leze in sciô travaggio che gh'é òua;
3. Lòtta à quæ se segge forma de rassìximo e ghettizzaçion, scin a-o ponto d'avei sacciùo accheugge de gente scappæ d'in Arbania, i Duasso, i quæ, unna vòtta che se son libeæ da-a scciavitù, ma respetoxi de leze e de usanse da Repùbbrica, an sacciùo guägnâse a stimma e a confiansa da popolaçion scin à dâ eutto Duxi a-a Repùbbrica (notta: i Duxi son neuve se se conscidera ascì quello do tempo de Napolion) e à vegnî à ëse unn-a de famigge ciù astimmæ da Comunitæ;
4. Separaçion assolùa, tra Gexa e Poei Çivile, tanto che i Supeioî da Gexa no poeivan ottegnî càreghe pùbbriche;
5. Comportaçion religiosa e refùo de quæ se segge fondamentalìximo, quande inte tutta l'Euròpa se descadenava a duìscima e crùa Inquixiçion;
6. Forma instituçionale Repubbricann-a, pe quelli tempi zà democràtica (o Gran Conseggio da Repùbbrica o l'ëa compòsto de 400 personn-e; pe-e delibeaçioin ghe voeiva unna maggioansa qualificâ, i doî tersi, de soventi i quattro quinti), intanto che inte tutto o mondo d'allöa dominava e monarchìe féudale, ereditäie, dispòtiche, ötoritäie;
7. Ordenamento interno lìgure zà fedealista, lëgio e no guæi burocràtico adattòu à un pòpolo ch'o refuava a guæra comme instrumento de conquista e de dominaçion di pòpoli: e Comunitæ lìguri aivan di sò Statuti e ëan ligæ a-a Repùbbrica de Zena da di vëi "patti fedeali", coscì che a Repùbbrica de Nöi a se goernava da pe lê, comme ascì a Magnìfica Comunitæ di Eutto Leughi (Campurussu, Valebona, Valecroesa, San Giaixu, Sasciu, Soudan, Burghetu, e Burdighea);
8. Proteçion de l'ambiente, do paisaggio e de l'urbanìstica, baste pensâ a-o bon uso do territöio, che se fäva co-e avvoxæ fasce lìguri, e a-i bellìscimi çentri istòrichi de nòstre comunitæ, che n'à lasciòu in ereditæ i nòstri antighi;
9. Contròllo "a posteriori" de longo e à tutte e mainëe, de tutto quello che fa e gente de goerno, con l'Instituto di Supremmi Scindicatoî, franco conträio de quello che intravegne a-a giornâ d'ancheu, che o contròllo, fæto "a priori" ò intanto che gh'é o Goerno in càrega, o ven realizzòu da 'nna burocraçia pesantìscima, bonn-a da paralizzâ, ò a-o manco rallentâ de pe coscì, i effetti di lezìttimi Poei deçixonali de quelli che goerna, elezzùi da-o consenso popolare;
10. Organizzaçion polìtica fondâ in sciô refùo da tirannìa e da guæra de conquista di territöi e di pòpoli, de soventi con pagâ i scignoöti e tiranni di paixi pe riscattâ e popolaçioin che voeivan fâ parte da Repùbbrica de Zena e, into mæximo tempo, con respetâ e sovranitæ di Féudi Impeiali.

Sciacca chì adòsso pe-o scito ofiçiâ do
Mil - Movimento Indipendentista Ligure