M.I.L. Movimento Indipendentista Ligure Via XX Settembre 21/7 (4° piano) - 16121 Genova tel e fax 010-585263 e-mail mil@mil2002.org

Sciacca chì adòsso pe-o scito ofiçiâ do
Mil - Movimento Indipendentista Ligure

M.I.L.

Chi semmo, cöse voemmo

(Verscion zeneize de Lusciandro Guason)

[ premissa ] [ chi semmo ] [ cöse voemmo ] [ chi no semmo ] [ perché Liguria Independente? ] [ quæ forma instituçionale in avvegnî pe-a Liguria? ] [ obiettivo à mezo tèrmine ] [ obiettivi stratégichi pe l'anno 2001 ] [ appello ]

[ comenso da pàgina ]

[ comenso da pàgina ]

Chi semmo

A-i 14 de Zenâ do 2001 s'é constituïo con offiçialitæ o M.I.L. - Movemento Independentista Lìgure che se gh'é scrïto di çittæn lìguri de despæge provegnense (operäi, dònne de casa, impiegæ, artexæn, penscionæ, dirizzenti, insegnanti, professoî d'universcitæ, lìbei profescionisti, etc.) con sottascrive o Statuto, che se n'arregòrda chì a premissa istòrica e a raxon d'ëse.

[ comenso da pàgina ]

Cöse voemmo

Appreuvo à quello che s'é dïto, a finalitæ diffìçile da arrivâghe ma poscìbile, a l'é quella de fâ conosce, à livello internaçionale ascì, o nòstro drïto d'existe comme"Naçion Sovrann-a Independente" tegnùo conto che i drïti internaçionali e in particolâ o drïto à l'ötodeterminaçion di pòpoli son universalmente conscidiæ da no poeise prescrive.

Pe dâ into segno, çe revolziëmo a-e Naçioin e a-i organìximi internaçionali; inandiëmo de açioin giurìdiche e polìtiche, sensa violensa e in paxe, ma ferme e articolæ, intanto che, da-o ponto de vista ascì de 'nna ciù grande Comunitæ Éuropea, ne segge conosciùo o drïto à existe torna comme Naçion-Stato, legatäia lezìttima de l'antiga e gloiosa Repùbbrica de Zena.

Neçessäio ciù che tutto a-a nòstra còusa l'é de spantegâ e docomentâ, no solo drento a-a comunitæ lìgure e màscime tra e neuve geneaçioin, a soverciaia ch'a l'é stæta fæta a-o pòpolo lìgure; sto chì pe contrappónn-ise a-a fäsa istöia "stæta confeçionâ appòsta" che, tòsto pe doî sécoli, a l'é stæta scrïta e spantegâ da-i vinçitoî.

A realizzaçion de sto nòstro "dexidëio", comme à dî "avei torna l'independensa e a sovranitæ da nòstra patria lìgure", a l'é l'ùnica raxon che çe semmo constituïi inte 'n movemento polìtico e semmo segùi ch'o se porrià realizzâ, se i ciù tanti lìguri, conscenti di sò drïti, respondian con 'nna mobilitaçion lesta, d e gran diffuxon, e determinâ.

[ comenso da pàgina ]

Chi no semmo!

Pe sghindâ de stromentalizzaçioin sgreuzze, dimmo a-a primma che staiëmo appreuvo à st'obiettivo sensa nisciunn-a intension rassista ò csenòfoba; semmo de l'opinion de fæto che a Liguria a l'à da contunniâ à ëse quello ch'a l'é de longo stæta: tæra de gente lìbea, mai omogenia in ponto rassa, ch'a da ciù a mente a-a mainëa de vive che a-a rassa e a-o cô da pelle. Son sti chì i critëi con che o pòpolo lìgure o l'à de longo visciùo e con che o l'à sacciùo creâ unna vëa e pròpia çiviltæ do Mediterranio, into respëto de leze, de tradiçioin e da comportaçion!

No semmo manco un ätro movemento seçescionista! No ciammemmo nisciunn-a separaçion: pensemmo, de fæto, che no gh'agge senso voei scompartî quello che, segondo niätri, o n'é mai stæto unïo in libertæ e democraçia! Maniman no tutti san che o Pòpolo Lìgure o n'é mai stæto ciammòu à esprìmmise, con de votaçioin lìbee e democràtiche, in sce l'annescion a-o regno di Savòia, e nì a-o regno d'Italia!

[ comenso da pàgina ]

Perché Liguria Independente?

Appreuvo che, da un examme di avvegnimenti istòrichi che l'é intravvegnùo dòppo o Congresso de Vienna, se peu dî, segondo niätri, che quella prepotensa a l'à avùo söo che de conseguense negative, stæte patïe da-o pòpolo lìgure, allantöa e òua. In particolâ segnalemmo sti fæti chì.

1. O stato unitäio savoiardo, nasciùo in sciâ pissa de baionette (o sollevo de Zena do 1849 o l'é stæto sciaccòu into sangue de centanæa de mòrti e de dònne violentæ) o l'à adeuttòu o pezo çentralìximo giacobin, burocràtico e sordattesco-opprescivo ch'o l'à destruto l'iniçiativa mercantile, imprenditoiale e finansiäia di lìguri.
2. Do 1915, stæti "ligæ a-o cäro itàlico" semmo stæti rebellæ inta primma e tremmenda guæra mondiale (con di mioin de mòrti) ch'a l'à portòu à nasce e "rouxìe naçionale" ch'an inti fæti provocòu a vegnùa do "Nazìximo", de agrùe rassiale e do mæximo "Fascìximo".
3. Da-o 1939 a-o 1945, stæti torna rebellæ inte l'ancon ciù tremmenda segonda guæra mondiale, ch'a l'à misso into mezo a popolaçion lìgure sensa defeisa, con çittæ destrute e çentanæa de miggiæa de mòrti, se semmo attrovæ mescciæ inte 'nna vertadëa guæra çivile ch'a l'à lasciòu agrùe e rouxìe che se rebéllan ancon òua.
4. Dòppo o 1946 doveiva nasce unn'Italia repubblicann-a, democràtica, çivile etc. e in cangio çe semmo attrovæ inte 'nna Naçion ch'a no l'à ancon sacciùo, çinquant'anni appreuvo, resciòrve i problemi da maffia, da camöra, da 'ndràngheta, da sacra (?) coronn-a unïa, etc. e in ciù a l'à conosciùo straggi, strategie da tenscion, tangentòpoli, etc.

O l'é sto chì o Stato che o Pòpolo da Naçion Lìgure, lezìttimo legatäio de l'antiga e gloiosa Repùbbrica de Zena, o veu? E ben, niätri no çe ô creddemmo! A nòstra Istöia Patria a ne mostra che:

1. o l'é stæto o Comun de Zena, che do 970 o l'à desmätòu i corsæ möi che scorrattàvan de pe-o mediterrànio, con desniâli d'inta seu tann-a de Saint Tropez, e sto chì o l'é stæto, inti fæti, l'embrion da Repùbbrica de Zena;
2. a "comunitæ" lìgure de Zena a l'é stæta l'ùnica che do 1158 a s'è fæta respetâ da-o "Barbarossa" con tiâ sciù, inte pöco giorni, de muäge imposcìbile da piggiâ, e con refuâse de pagâghe i "tributi de vassallaggio";
3. da-o sécolo unzen a-o sécolo dozzen a l'é stæta a ciù grande potensa mainæa (militare e mercantile) do "mondo" d'allantô (ancon òua e avvoxæ battagge navale da Melöia, contra Pisa do 1284, e de Scùrzoa, contra Veneçia do 1298, en studdiæ inte ciù prestigiose accademie navale), e dappeu a l'à sacciùo cangiâse inta ciù grande potensa finansiäia, scin à tutto o sécolo sezzen;
4. a Repùbbrica de Zena, quande pe-i seu tràffeghi a l'aiva neçescitæ de di attracchi segùi, a se metteiva d'accòrdio pe 'n giusto prexo con che pagâ i lezìttimi propietäi, sensa intentaçioin de conquistâ o primmô; à quella mainëa l'é nasciùo e "maonn-e" e i "fóndeghi" ch'an dæto o viavinti à un vertadëo "grande mercòu" inte tutto o mediterrànio, donde o steu mercantile o traffegava, con gran recæita de ricchessa pe tutta a Comunitæ lìgure.

In ciù, voemmo arregordâ che, tanto che tutti i ätri Stati Éuropei ëan goernæ da de monarchìe ötoritäie e ereditäie, a Liguria, da sempre, a s'aiva dæto un scistema instituçionale repubbrican ch'o l'aiva de drento unn'orma fedealista co-a ciù grande ötonomia de comunitæ perifériche; baste pensâ che o piccin Comun de Paròdi Lìgure, che ancheu o l'é in Piemonte, o l'aiva un sò Statuto e che Nöi a l'ëa unna Repùbbrica sovrann-a e independente, "confedeâ" co-a Repùbbrica de Zena!

In sciâ fin, se se veu partî da conscideaçioin e constataçioin "reale e attuale": tanto che i grændi Stati cöran verso a coscì dïta "economia globale", e Naçioin piccinn-e, che n'an nisciunn-a coæ de fâse annette da quelle ciù grænde, che ghe confinn-an, son inta realtæ quelle che se goèrnan ciù ben e gh'an o ciù fòrte desviluppo e ciù bon stâ (San Marin, Mùnegu, Luxemburgo, Irlanda, Scingapô, etc.); pe no parlâ do fæto che do 1946 gh'ëa söo che 74 Stati Sovræn, tanto che a-a giornâ d'ancheu ghe n'é zà 192! Pe sta raxon pensemmo che a Liguria ascì a pòsse sarçî sta stradda chì che, à parte tutto, into caxo particolâ a l'é unna stradda basâ escruxivamente in sciô Dirïto Internaçionale, comme dî sensa sollevi, violense, açioin armæ, menasse de seçescion, etc.

Ne pâ donca scin tròppo ciæa a resposta a-a domanda "perché Liguria Independente"! À parte e conscideaçioin che gh'é zà de drento a-i argomenti stæti desviluppæ de d'äto, voemmo l'independensa pe:
"dâ torna a-o pòpolo lìgure o senso da seu responsabilitæ dòppo dexenn-e d'anni de burocraçìa nescia e de ascistensialìximo inteessòu do Stato Italian; ascistensialìximo e burocraçìa an scassòu quello spïto mercantile, finansiäio e imprenditoiale che, stæto sponciòu da l'independensa individuale e da-a meitocraçìa, o l'aiva produto into passòu moscitæ e bon stâ, e o l'aiva fæto da nòstra Repùbbrica unna protagonista de l'istöia éuropea e un exempio d'amministraçion pùbbrica".

[ comenso da pàgina ]

Quæ forma instituçionale in avvegnî pe-a Liguria?

Appreuvo à quello ch'emmo dïto de d'äto, a Repùbbrica de Zena a l'ëa zà un exempio de "fedealìximo" tra e comunitæ lìgure d'allantô e o nòstro "seunno" o l'é de constituî torna quello modello, con tegnî conto - s'accapisce - che i tempi en cangiæ, ma in conservâ a ciù ancia ötonomìa do territöio a-e comunitæ omogénie che existe òua; l'ipòtexi, che de segùo a dovià ëse çerneggiâ, raxonâ e appreuvâ da tutti i "çittæn lìguri", a l'é quella de 'nna "Repùbbrica fedeale lìgure", à uso Svìssea, scompartïa inte despæge provinse (i Cantoin), con che i "Çittæn" lìguri, traverso a rappresentansa de partïi, liste, movementi etc. (comme a-a giornâ d'ancheu, ma pe ciæe raxoin ciù vexin a-e gente) goernian a Liguria Independente.

[ comenso da pàgina ]

Obiettivo à mezo tèrmine

Vegnî à ëse unna fòrsa polìtica popolare, spantegâ onde se segge, e inseïa inte categorìe da produçion, inti organìximi soçiali e inti enti de gestion pe:

• influî, à sò tempo, con di nòstri rappresentanti ò traverso quelli de ätri partïi con de finalitæ semeggeive, in scê deçixoin polìtiche, econòmiche e instituçionale, che saian piggiæ in examme da-i rappresentanti da Region Liguria;
• mette in ciæo, con portâli à l'attension de gente, e attivâ a concretizzaçion, de scituaçioin, fæti, ipòtexi, poscibilitæ e opportunitæ, trascuæ, ascordæ ò piggiæ sotta gamba da-i attuali responsàbili di òrgani de rappresentansa do Pòpolo Lìgure, con l'intension de fâ accapî da maniman de ciù i avvantaggi ch'aviëscimo into repiggiâçe a nòstra sovranitæ in sciô territöio.

[ comenso da pàgina ]

Obiettivi stratégichi pe l'anno 2001

1. Fâ inseî, con appropiâ e opportunn-a formolaçion into Statuto Regionale che l'é appreuvo à ëse scrïto, o conçetto che "a Liguria a l'à o drïto internaçionale no prescriveive de véddise restituî l'independensa e a sovranitæ, che gh'an levòu con un atto no lezìttimo".
2. Fâ cresce o proselitìximo, con a ciù sottî campagna d'informaçion indirissâ à scìngoli çittæn, categorìe profescionale, partïi polìtichi, movementi, assoçiaçioin, club, enti privæ e pùbbrichi etc. con particolâ attension verso e Provinse d'Imperia, Spezza e Sann-a, che 'na vëa "propaganda de regimme" a gh'à ascoso con intension l'ànima "fedealista e ötonomista" da forma instituçionale "repubbricann-a" da "Repùbbrica de Zena".
3. Organizzâ a struttùa fonsionale do M.I.L.
4. Inandiâ di contatti à livello polìtico e giurìdico e studdiâ con de personn-e intrante de drïto internaçionale e régole e e modalitæ pe arriescî inta raxon societäia.
5. Progettâ e modalitæ d'attuaçion de 'n notiçiäio periòdico d'informaçion pe-i Soçi.

Pe quello ch'emmo dïto de d'äto, femmo appello à tutti i rescidenti inta Liguria, ò che séggian nasciùi chì, ò vegnùi da feua, de Drïta, de Çentro ò de Senestra, con regordâghe che, comme segondo l'antigo proverbio "l'union a fa a fòrsa", semmo segùi che unna fòrte adexon a-o M.I.L. a porrià dâne a fòrsa che ghe veu pe ottegnî l'obiettivo che o Movemento o pòrta con orgheuggio into sò nomme!

[ comenso da pàgina ]

Zena, Agosto - Settembre 2001

[ comenso da pàgina ]